​ភ្នំពេញ​៖ ក្រសួង​ការងារ និង​បណ្ដុះបណ្ដាល​វិជ្ជាជីវៈ បានជ្រើសរើស​យកមុខ​ជំនាញ​ចំនួន ៥ សម្រាប់​ដាក់​ប្រឡង​ថ្នាក់ជាតិ ដើម្បី​ស្វែងរក​បេក្ខជន​ដែលមាន​សមត្ថភាព និង​អ្នកទទួលបាន​ជ័យលាភី​ឆ្នើម មុននឹង​យកទៅ​ប្រកួតប្រជែង​ជំនាញ​អាស៊ាន នៅ​ឆ្នាំ ២០១៦​។​

​មុខជំនាញ​ទាំង ៥ ដែល​នឹងត្រូវ​ជ្រើសរើស សម្រាប់ធ្វើ​ការប្រកួតប្រជែង​ជំនាញ​ថ្នាក់ជាតិ​លើក​ទី​៥​នេះ រួមមាន ជំនាញ​រៀប​ឥដ្ឋ ជំនាញ​ត​បណ្ដាញ​អគ្គិសនី ជំនាញ​ផ្សារ ជំនាញ​រចនា​គេហទំព័រ និង​ជំនាញ IT Software Solution for Business​។ ចំពោះ​អ្នក​ដែល​ទទួលបាន​ជ័យលាភី​ថ្នាក់ជាតិ នឹងត្រូវ​ជ្រើសរើស​តាម​មុខ ជំនាញ​នីមួយៗ សម្រាប់​យកទៅ​ប្រកួតប្រជែង​ជំនាញ​អាស៊ាន ដែល​នឹង​ប្រ​ព្រឹ​ត្ដទៅ នៅ​ទីក្រុង​គូ​ឡា​ឡាំ​ពួ ប្រទេស​ម៉ាឡេស៊ី នា​ខែកញ្ញា ឆ្នាំ ២០១៦ ខាងមុខនេះ​។​

​គួរ​ជម្រាប​ថា បេក្ខជន​ដែល​ទទួលបាន​ចំណាត់ថ្នាក់ និង​ជ័យលាភី នឹងត្រូវ​បាន​លើក​ទឹក​ចិ​ត្ដ​ពី​រាជរដ្ឋាភិបាល ដោយ​មេដាយមាស ទទួលបាន​រង្វាន់ ៣​លាន​រៀល មេដាយប្រាក់ ទទួលបាន​រង្វាន់ ២​លាន​រៀល និង​មេដាយសំរិទ្ធ ទទួលបាន ១​លាន​រៀល​។​

​យោងតាម​ការសិក្សា​ស្រាវជ្រាវ​ថ្មី​មួយ ស្ដីពី​មុខវិជ្ជា​ជំនាញ​ដែល​និស្សិត​នៅ​កម្ពុជា ជ្រើសរើស​មុខជំនាញ​បន្ទាប់ពី​បញ្ចប់​ការសិក្សា​នៅ​ថ្នាក់​វិទ្យាល័យ បាន​ឲ្យ​ដឹងថា និស្សិត​កម្ពុជា​ប្រហែល​ជាង ៦០​ភាគរយ ជ្រើសរើស​មុខវិជ្ជា​ជំនាញ​របស់ខ្លួន តាម​ចំណង់​ចំណូលចិត្ត​ផ្ទាល់ខ្លួន ជាជាង​តាម​តម្រូវការ​លើ​ទីផ្សារ ខណៈ​ដែលមាន​ចំនួន​និស្សិត​ប្រហែល ៣០​ភាគរយ​ប៉ុណ្ណោះ ជ្រើស​មុខជំនាញ​តាម​តម្រូវការ​លើ​ទីផ្សារ នេះ​បើតាម​តាម​ការចុះផ្សាយ ពី​សាកលវិទ្យាល័យ អាមេរិកកាំង​ភ្នំពេញ (AUPP)​។​

​យ៉ាងណាមិញ បើតាម​ប្រសាសន៍ ឯកឧត្តម អ៊ិត​សំហេង រដ្ឋមន្ត្រីក្រសួង​ការងារ​និង​បណ្តុះបណ្តាល​វិជ្ជាជីវៈ​បាន​ឲ្យ​ដឹងថា បច្ចុប្បន្ននេះ​ក្រសួង​កំពុងផ្តល់​អាទិភាព​ថ្មី​ទៅលើ មុខជំនាញ​ចំនួន បី គឺ​ជំនាញ​យានយន្ត​កសិកម្ម ផ្នែក​អគ្គិសនី និង​ផ្នែក​សំណង់ ដោយសារ​ជំនាញ​ទាំងនេះ កំពុងមាន​តម្រូវការ​ខ្ពស់​លើ​ទីផ្សារ ដែល​សិស្ស​និស្សិត​រៀន​ចប់​ហើយ អា​ចរក​ការងារ​ធ្វើបាន​ដោយ​ងាយ និង​ទទួលបាន​ប្រាក់បៀវត្ស​សមរម្យ​ថែមទៀត​៕

​ប្រភព​៖ businesscambodia

​